Olivier de la Mer - Ozils de Cadartz

Ogiers, ou Ogier Niella. Voyez Augier.

P. Occ. 397.

Olivier de la Mer. Un couplet:
Ai! cal merce fera deus,
Cant us valenz paire mor,
Que laisses apres sa vida
Lo seu bel captenemen
A son fill ab l' eretamen;
Pos vezem c' aisso non es,
Ages un bel nebot cortes...
Crescimbeni, 202. Millot, III, 421.

Olivier le Templier. Une pièce.
Estat aurai lonc temps en pessamen
De so don ieu vuelh un sirventes far,
Car no vey res que m poges conortar
De l' or' en say, qu' el bon rey fon perden...
Pels Turcx savais mot laiamen aunitz;
Mas ara m platz, car vey que no 'ls oblida,
Ans clamaray mentr' el cors aia vida...

Per qu' ieu prec sel qu' es visibles trinitz,
Ver dieu, vers homs e vers sant esperitz
Qu' el lur sia ver' estela caramita,
E 'ls guit e 'ls gart e 'ls perdon lor falhida...

Si 'l rey Jacme ab un ters de sa jen
Passes de lay, leu pogra restaurar
La perd' e 'l dan, e 'l sepulcre cobrar;
Car contra lui Turcx non an garimen...
Estat aurai lonc.
Millot, III, 421.

Oste. Une tenson avec Guillaume, auquel il propose cette question:
Guillem, razon ai trobada,
Tal cum ie us dirai
De dos cavalliers qu' ieu sai
Qu' estan en un' encontrada;
Chascuns es valens e pros;
Digatz cal val mais d' amdos,
Que l' us es pros per amor veramen,
Mas anc l' autre non ac cor ni talen?
Guillem razon.
Millot, III, 421.

Ozils de Cadartz. Une pièce.
Assatz es dreitz, pus joys no m pot venir,
De re qu' ieu am ni no m ven a plazer,
Qu' ieu diga totz quo us devetz captener,
Vos amadors, que amatz per figura.
Siatz humil et adreg et acli,
Et ieu dic o qu' anc pro no m tenc a mi;
Mas ges per tant mos planhs no us espaven,
Que pro y auretz, si m crezetz, lonjamen,
Car moutz n' i a que no y van per mezura.

En nulhs delieytz no pot esdevenir
Nulhs bos amicx, s' aissi non siec l' esper
Qu' am la bruna per mielhs far son voler
E l' amicx ros la rossa per natura;
Que quasquns joys cove qu' aissi s detri,
Et ieu dic o per tal qu' om s' en casti,
Que li tarzan no s mesclon ab l' arden,
Ni li cochan ab selhs que y van ab sen,
Quar, si o fan, non er l' amistatz pura...
Assatz es.
Millot, III, 421.

VI, Ailas! per que viu lonjamen ni dura

VI.

Ailas! per que viu lonjamen ni dura

Selh que totz jorns vei creysser sa dolor,

Qu' er son tornat tug li miey gaug en plor

Per un fel dol que dins mon cor s' atura;

Q' uey non es joys tan grans, quan m' o cossir,

Qu' el dol qu' ieu ai me pogues escantir;

Per so non puesc motz ni sos acordar,

Qu' om, quan plora, no pot ges be chantar.

Chantar m' ave tot per aital natura

Cum lo signes que chanta ab dolor

Quan mor, et ieu chan, planhen mon senhor

Que ai perdut, ab dol et ab rancura,

N Ono Sanchitz, per cui degra morir

Quan lo perdiey, s' om si degues aucir;

E quant hom pert son bon senher e car

Degra morir, pus mais no 'l pot cobrar.

Ja non diray tan gran dezaventura,

Senher N Ono, sitot m' ai gran dolor

Que siatz mortz, quar diria folhor;

Qu' aysselh es mortz de cuy dieus non a cura,

Mas dieus vos a mandat a se venir,

Quar saubes luy e joy e pretz servir;

Mas selhs son mortz que us solion amar,

Que us an perdut, senher, ses recobrar.

Ab vos es mortz sens, franquez' e mezura,

Per que totz hom en deu aver dolor,

E tug bon ayp que tanhon a valor

Moron ab vos, per que reviu falsura

Say entre selhs que no s' en fan grazir;

Mas qui vol pretz els vostres faigz se mir,

Qu' aissi sabra dieu e pretz guazanhar,

E si mezeys e tota re honrar.

Ar puesc ben dir que tot lo mon peiura,

Q' uey non es joys que non torn en dolor,

Mas sol del ric joy de nostre senhor;

Per que m par folh qui enten ni s' atura

En autre joy mas en dieu obezir.

Segle caitiu, ab dolor faitz fenir

Totz vostres faigz, per qu' om no s deu fizar 

En vostr' amor, mas per son benestar!

Senher N Ono, de vos puesc per ver dir

Qu' anc non l' ames mas quan per dieu servir,

E per los sieus enantir et honrar,

E per los mals confondre et abaissar.

Senher, dieu prec la vostr' arma ampar,

Que say m' avetz pro layssat que plorar.

Aimeri de Bellinoi.