Tenson de Pistoleta et d'une Dame.

Tenson de Pistoleta et d'une Dame.

Bona domna, un conseill vos deman

Que m' el dones, que molt m' es grant mestier;

Qu'en una domna ai mes tot mon talan,

Ni nuilla ren tan no desir ni quier;

E diguas me si laudatz que l' enquera

De s' amistat, o enquar m' en sofrieira;

Qu'el reprovier retrai certanamen:

Qui s cocha pert, e consec qui aten.

Seingner, ben dic, segon lo mieu semblan,

Que ben o fai qui bona domna enquier,

E cel sap pauc qui la va redoptan;

Car anc domna no feri cavalier,

Mas s' el no ill platz que s' amor li profera;

No i a plus dan e neguna maniera;

Que bona domna a tan d' enseignamen;

Qu'ab gen parlar s' en part cortesamen.

Domna, eu tem que, si 'l deman s' amor,

Que m responda so que mal me sabra,

E que s' albir son pretz e sa ricor,

E que m digua que ja no m' amara.

Miel m' er, so cre, que il serva et atenda

Tro qu' il plassa que guazardon mi renda;

E digatz me, segon vostre escien,

Si farai ben o s' eu dic faillimen.

Seingner, totz temps fols a folia cor;

Mas cels es fols que la folia fai,

E cant hom sers lai on non a valor,

Pois s' en penet, que nuill gazaing non a;

Ans deu saber que ja gair' en despenda,

Si 'n pot aver guizardon ni esmenda;

E si 'l conois qu' ill aia bon talen,

Serva si dons en patz e bonamen.

Bona domna, pois aissi me laudatz,

Ieu l' enquerai ades senes faillir,

E tenc per bon lo conseill que m donatz,

Ni ja no 'l voill ni camjar ni gequir;

Que ben sabetz del don, senes faillensa,

Si vol amar, o si a entendensa;

E podetz m' en valer veraiamen,

Sol vos plassa, ni 'l cors vos o cossen.

Seingner, e us prec que la domna m digatz

On eu vos puesc' e valer e servir;

E dic vos ben, e voill que me crezatz,

Qu' ie us en sabrai la vertat descobrir,

E far vos n' ai aisina e cosensa

Mantas sasos, s' en leis en trob faillenssa;

E digatz la ades de mantenen,

E non doptetz ni n' aiatz espaven.

Bona domna, tant es cortes' e pros,

Que ben sabetz s' ieu vos am ni us vol be;

Que tal joi ai quant puosc parlar ab vos

Que de ren al no m membra ni m sove;

E doncs podetz saber a ma semblansa

E conoisser... Mon dig vas vos balansa!...

Vos es cella vas cui mos cors s' aten.

Merce, domna, car tan dic d' ardimen!