XXXII, Ja de far un nou sirventes

XXXII.

Ja de far un nou sirventes

No quier autre ensenhador,

Que ieu ai tan vist et apres

Ben e mal e sen e folhor,

Qu' ieu conosc blasme e lauzor,

E conosc anta et honor;

E conosc que malvat labor

Fan Lombart de l' emperador.

Quar non lo tenon per senhor

En aissi com deurian far,

E si 'lh non repaira enves lor

En breu per sas antas venjar,

L' emperi s' en poira clamar

D' elh e del sieu emperiar,

Se laissa tolre ni mermar

Lo dreyt qu' elh deu adreyturar.

E si l' emperaire reman

Que non cobr' er so qu' om li tol,

Jamais de bon pretz sobeiran

Non aura tan com aver sol;

E doncx clars estic son lansol;

Qu' ieu auzi dir a mon auiol

Que qui non dona so que 'l dol

Mantas vetz non pren so que s vol.

Mas l' emperaire poderos

A tan de sen e de saber

Que s' elh repaira enves los,

Apoderat ab son poder,

Ja nulh no s' auzara mover

Que no fassa tot son voler;

E prec dieu que m' o lais vezer 

A mon pro et al sieu plazer.

Guillaume Figueiras.

XXXI, Quant vei lo temps renovellar, (Bertrand de Born, le fils)

XXXI.

Quant vei lo temps renovellar,

E pareis la fueill' e la flors,

Mi dona ardimen amors

E cor e saber de chantar;

E doncs, pois res no m' en sofraing,

Farai un sirventes cozen

Que trametrai lai per presen

Al rei Joan que s n' a vergoing.

E deuria s ben vergoignar,

S' il membres de sos ancessors,

Com laissa sai Peitieus e Tors

Al rei Felip ses demandar;

Per que tota Guiana plaing

Lo rei Richart, qu' en deffenden

En mes mant aur e mant argen;

Mas acest no m par n' aia soing.

Mais ama 'l bordir e 'l cassar,

E bracs e lebriers et austors

E sojorn, per que il faill honors,

E s laissa vius deseretar;

Mal sembla d' ardimen Galvaing,

Que sai lo viram plus soven;

E pois autre cosseil non pren,

Lais sa terra al seignor del Groing.

Miels saup Lozoics desliurar

Guillelme, e 'l fes ric secors,

Ad Aurenga, quan l' Almassors

A Tibaut l' ac fait asetjar;

Pretz et honor n' ac ab gazaing:

Ieu o dic per chastiamen

Al rei Joan que pert sa gen,

Que non lor secor pres ni loing.

Baron, sai vir mon chastiar

A vos cui blasme las follors

Que us vei far, e pren m' en dolors,

Car m' aven de vos a parlar,

Que pretz avetz tombat el faing,

Et avetz apres un fol sen,

Que non doptas chastiamen,

Mas qui us ditz mal, aquel vos oing.

Domna, cui dezir e tenc car

E dopt e blan part las meillors,

Tant es vera vostra lauzors

Qu' ieu non la sai dir ni comtar;

C' aissi com aurs val mais d' estaing,

Valetz mais part las meillors cen

Et ez plus leials vas joven

Non son a dieu cill de Cadoing.

Savarics, reis cui cors sofraing

Greu fara bon envasimen,

E pois a flac cor recrezen,

Jamais nuls hom en el non poing.

Bertrand de Born, le fils.

XXX, D' un sirventes faire Es mos pessamenz (Pierre de la Caravane)

XXX.

D' un sirventes faire

Es mos pessamenz

Qu' el pogues retraire

Viatz e breumenz,

Qu' el nostr' emperaire

Ajosta grans genz.

Lombart, be us gardatz

Que ja non siatz

Peier que compratz,

Si ferm non estatz.

De son aver prendre

No us mostratz avars,

Per vos far contendre

Ja non er escars;

Si 'l vos fai pois prendre,

L' avers er amars:

Lombart, be us gardatz, etc.

De Puilla us soveigna

Dels valenz baros,

Qu' il non an que preigna

For de lor maizos,

Gardatz non deveigna

Atretal de vos;

Lombart, be us gardatz, etc.

La gent d' Alamaigna,

Non voillas amar,

Ni la soa compaigna

No us plassa usar,

Quar cor mi 'n fai laigna

Ab lor sargotar.

Lombart, be us gardatz, etc.

Grant Nogles ressembla

En dir Borderguatz

Lairan, quant se sembla;

C' uns cans enrabiatz

No voillatz ja venga,

De vos lo loignatz.

Lombart, be us gardatz, etc.

Dieus gart Lombardia,

Boloigna e Milans

E lor compaignia,

Bresa e Mantoans,

C' uns d' els sers non sia,

E 'ls bons marquesans.

Lombart, be us gardatz, etc.

Dieus salf en Sardeigna

Mon Malgrat De Totz,

Quar gens viu e reigna,

E val sobre totz,

C' uns quant l' arc non seigna

De deguna votz.

Lombart, be us gardatz, etc.

Saill d' Agaitz, be m platz

Quar tant gent reignatz

Verones honratz,

E si ferm estatz

Lombart be us gardatz.

Pierre de la Caravane.

XXIX, En aquell temps qu' el reys mori 'N Anfos

XXIX.

En aquell temps qu' el reys mori 'N Anfos

E sos belhs fils qu' era plazens e pros,

E 'l reys Peire de cui fon Araguos,

E 'N Dieguo qu' era savis e pros,

E 'l marques d' Est, e 'l valens Salados,

Adoncx cugei que fos mortz pretz e dos,

Si qu' ieu fui pres de laissar mas chansos,

Mas ar los vey restauratz ambedos.

Pretz es estortz qu' era guastz e malmes,

E dons gueritz del mal qu' avia pres,

Q' un bon metge nos a dieus sai trames

Deves Salern savi e ben apres,

Que conoys totz los mals e totz los bes,

E mezina quascun segon que s' es;

Et anc loguier non demandet ni ques,

Ans los logua, tant es francs e cortes!

Anc hom no vi metge de son joven,

Tan belh, tan bo, tan larc, tan conoissen,

Tan coratgos, tan ferm, tan conqueren,

Tan be parlan ni tan ben entenden,

Qu' el be sap tot, et tot lo mal enten;

Per que sap mielhs mezinar e plus gen,

E fai de dieu cap e comensamen,

Qu' el ensenha guardar de falhimen.

Aquest metges sap de metgia tan,

Et a l' engienh e 'l sen e 'l saber gran,

Qu' el sap ensemps guazanhar mezinan

Dieu e 'l secgle, guardatz valor d' enfan,

Qu' el sieu perden venc meten e donan

Sai conquerir l' emperi alaman;

Hueymais cre ben, com que y anes duptan,

Los faitz qu' om ditz d' Alixandr' en contan.

Aquest metges savis, de qu' ieu vos dic,

Fon filhs del bon emperador N Enric,

Et a lo nom del metge Frederic,

E 'l cor e 'l sen e 'l saber e 'l fag ric,

Don seran ben mezinat siey amic,

E i trobaran cosselh e bon abric;

De lonc sermon devem far breu prezic,

Que ben cobram lo gran segon l' espic.

Be pot aver lo nom de Frederic,

Que 'l dig son bon e 'l fag son aut e ric.

Al bon metge maiestre Frederic

Di metgia, que de metgiar no s tric.

Aimeri de Péguilain.

XXVIII, Foilla ni flors ni chautz temps ni freidura

XXVIII.

Foilla ni flors ni chautz temps ni freidura

No m fai chantar ni m merma mon talen,

Mas alor chan quant aug dir a la gen

Que bens li deu venir qui ben s' agura;

Dieus! tota bon' aventura

De patz ducs qu' es coms e marques

E patz de clercs e de Frances!

Patz sitot s' es bon' e ferma e segura,

Patz d' amistat qu' a tot estion gen,

Patz qu' a facha pros hom e leialmen,

Patz com puesc om ben amar ses rancura,

Bona patz mi platz cant dura,

E patz forsada no m platz ges;

D' avol patz ven mais mals que bes.

En cort de rei deu hom trobar drechura,

Et en glesa merce e chausimen,

E franc perdon de mortal faillimen,

Segon los ditz de la sainta escriptura;

E reis deu gardar mesura,

Car qui no 'l garda res peitz l' es,

Luocs fora que dans l' en vengues.

Si com hom mor de mortal forfaitura,

Deu esser ricx, cel que de bon talen

Serf bon seignor a poder lonjamen,

Qu' el bos seigner creis los sieus e 'lz meillura,

E 'l malvatz fort se peiura;

Per que m plagra fort c' om valgues

Als pros, et als malvatz nogues.

Reis deu amar et onrar sa natura,

Et al meillor deu far meilluramen

De mais d' onor et de mais d' onramen,

E deu gardar sa cort de desmesura;

E reis, c' a de bon pretz cura,

Deu creire als valens, als cortes,

Als plus onratz e meills apres.

Bernard de la Barde.

XXVII, Ab greu cossire Fau sirventes cozen; Bernard Sicart de Marjevols.

XXVII.

Ab greu cossire

Fau sirventes cozen; 

Dieus! qui pot dire 

Ni saber lo turmen,

Qu' ieu, quan m' albire,

Suy en gran pessamen;

Non puesc escrire

L' ira ni 'l marrimen,

Qu' el segle torbat vey,

E corrompon la ley

E sagramen e fey,

Q' usquecx pessa que vensa

Son par ab malvolensa,

E d' aucir lor e sey,

Ses razon e ses drey.

Tot jorn m' azire

Et ai aziramen,

La nueg sospire

E velhan e dormen;

Vas on que m vire,

Aug la corteza gen

Que cridon Cyre

Al Frances humilmen:

Merce an li Francey,

Ab que veio 'l conrey,

Que autre dreg no y vey.

Ai! Toloza e Proensa

E la terra d' Agensa,

Bezers e Carcassey

Quo vos vi e quo us vey!

Cavallairia,

Hospitals ni maizos,

Ordes que sia

No m' es plazens ni bos;

Ab gran bauzia

Los truep et orgulhos,

Ab simonia,

Ab grans possessios; 

Ja non er apellatz

Qui non a grans rictatz

O bonas heretatz;

Aquelhs an l' aondansa

E la gran benanansa;

Enjans e tracios

Es lor cofessios.

Franca clercia,

Gran ben dey dir de vos,

E s' ieu podia

Diria 'n per un dos;

Gen tenetz via

Et ensenhatz la nos;

Mas qui ben guia

N' aura bos gazardos;

Res no vey que us laissatz,

Tan quan podetz donatz,

Non autz cobeytatz,

Sofretz greu malanansa

E vistetz ses coinhdansa;

Mielhs valha dieus a nos

Qu' ieu no dic ver de vos!

Si quo 'l salvatges

Per lag temps mov son chan,

Es mos coratges 

Qu' ieu chante derenan;

E quar paratges

Si vai aderrairan,

E bos linhatges

Decazen e falsan,

E creys la malvestatz,

E 'ls baros rebuzatz,

Bauzadors e bauzatz

Valor menon derreira

E deshonor primeyra;

Avols ricx e malvatz

Es de mal heretatz.

Rey d' Aragon, si us platz,

Per vos serai honratz.

Bernard Sicart de Marjevols.

XXVI, Bel m' es cant aug lo resso

XXVI.

Bel m' es cant aug lo resso

Que fai l' ausbercs ab l' arso,

Li bruit e il crit e il masan

Que il corn e las trombas fan,

Et aug los retins e 'ls lais

Dels sonails, adoncs m' eslais,

E vei perpoinz e ganbais

Gitatz sobre garnizos

E m plai refrims dels penos.

E platz mi guerra e m sap bo

Entr' els rics homes que so,

E dic per que ni per tan,

Car nuilla ren non daran

Menz de guerra e de pantais;

Cascus se sojorna e s pais

Entro que trebaillz lor nais;

Pois son larc et amoros,

Humil e de bel respos.

Oimais sai qu' auran sazo

Ausberc et elm e blezo,

Cavaill e lansas e bran,

E bon vassaill derenan;

Pois a Monpeslier s' irais

Lo reys, soven veiretz mais 

Torneis, cochas et essais 

Als portals, maintas sazos 

Feiren colps, voidan arsos.

E si 'l bos reis d' Arago

Conquer en breu de sazo

Monpeslier, ni fai deman,

Eu non plaing l' anta ni 'l dan

D' En Guillem, car es savais,

Ni 'n tem lo seignor del Bais,

Anz eu mov contr' el tal ais,

Per la fe que dei a vos,

No sai si l' er danz o pros.

Pierre de Bergerac.

XXV, Sendatz vermelhs, endis e ros,

XXV.

Sendatz vermelhs, endis e ros,

E tendas e traps despleyar,

Elmes et ausbercs flameyar,

E brandir lansas e bordos,

E cayrels dessarrar espes,

E ferir de bran demanes

Veirem en breu, qu' el Lhaupart fenh

Que say per Flor culhir s' espenh.

Pecx er, si ses pro companhos

Se pleia de las Flors triar;

Pero si ben vol amparar

Lo castel, l' ala ni 'l bastos,

Passar pot Escotz et Engles,

Noroecx et Yrlans e Gales;

Mas tart n' aura y Flor de ver senh,

Si de larc despendre s' estrenh.

E si 'l play bella messios,

Gen prometre, largamen dar,

Semblara de linhatge car

Don foro 'ls fraires valoros

N Anricx e 'N Richartz e 'N Jofres

E poira cobrar Guianes

E Normandia, don me senh,

Car plus tost non troba mantenh.

Mot era genta l' ochaizos

Que Flor pogues Lhaupart mandar,

E sobre luy senhoreyar,

E l' agues tot jorn a sos pros

Per un pauc que de luy tengues:

Mas la flor nasc en aital mes

Que per tot s' espanh et atenh,

Si caut o freg no la destrenh.

E fora genser la razos

Que s coitesso del loc cobrar

On per Melchior e Gaspar

Fon adzoratz l' altisme tos,

Que quan l' us a l' autre comes:

Car, ses la decima, non es

Us tan caut qu' en armes un lenh

Ni 'n bastis trabuquet ni genh.

Al valen gay coms de Rodes

Tramet mon novel sirventes,

Que, si 'l plai, de s' amor me denh

Far alque novel entresenh.

Estiers do, qu' ieu non vuelh ni 'n pren, 

Mas honor de son bel captenh.

        Pierre du Vilar.

XXIV, Quor qu' om trobes Florentis orgulhos,

XXIV.

Quor qu' om trobes Florentis orgulhos,

Er los trob om cortes et avinens,

De gen parlar e de plazen respos;

Ben aia 'l reys Matfre qu' el noirimens

Lor a fait dar et aver dol e lanha,

Que 'l cap en son remas mains en despuelh.

Ai! Florentis, mortz etz per vostr' erguelh,

Qu' erguelhs non es sinon obra d' aranha.

Oi! rei Matfre, vos es tan poderos

Qu' ieu tenc per fol selh qu' ab vos pren contens,

Qu' ieu vey que sol un dels vostres baros

A 'ls Florentis destruitz e 'ls fai dolens,

Si qu' ieu no cre qu' en plan ni en montanha

Trobes hueimais qui us sia de mal acuelh;

Ni no conselh a cels del Caupiduelh

Qu' encontra 'l rey passon tost en Campanha.

Pierre Vidal.

XXIII, Del rei d' Arragon consir,

XXIII.

Del rei d' Arragon consir,

Que mantas genz l' au lauzar,

E totz sos faitz vei grazir;

Donc ben dei meravillar

Cossi pot far era treguas ni fis,

Qu' anc chai chastels no fo per lui assis:

Mais volc guerra filz del rei d' Etobia

Lo jorn que venc cavalcar a Peria.

Si son pretz vol enantir,

Ges er no s deu acordar;

Anz li deu ben sovenir

Qu' el coms fetz Sancho passar

En Proensa, e si 'l reis s' afortis,

Mais n' er temsutz per totz sos enemis:

Joves deu far guerra e cavalaria,

E quant er veillz, taing ben qu' en patz estia.

Eu vic ogan, ses mentir,

Mon Austoret amparar,

Si qu' anc pois no 'l dec faillir

Tro 'l fetz sa terra cobrar,

Cella que ill tol lo coms que sos paris

E sos oncl' es e sos peires vezis;

Trenta castels ten de sa seingnoria:

Mal' er la fins, se aquels no ill rendia.

A mo Joan auzi dir

Que fai 'N Aimeric jurar

Et a 'N Bertran, a venir

Per lo comte guerreiar;

Totz tres gaban qu' els marcs e 'ls esterlis

Faran metre els enaps e 'ls bacis,

E 'l reis fara merce e gaillardia,

Se saint si lo mante e l' abazia.

Guionet, si m vols servir,

Lo comte m vai saludar,

E di qu' a lui volc esdir

Tro m fetz Angles gueraiar,

Non li fis mal, anz era sos amis

Mais de fizel perponz de saint Daunis;

Si ren m' a tolt pois, perdonat li sia,

De tot aisso qu' eu tenc en ma baillia.

Quant que m fezes ejauzir

Amors, era m fai plorar,

E m tol manjar e 'l dormir

Per vos, domna, cui dieus gar:

No us puos vezer, mas be us sui francs e fis, 

Qu' autra del mon no m platz ni m' abellis; 

Mais am de vos sol la bella paria

Que s' autra m des tot quant eu li queria.

Bona domna, la meiller qu' anc hom vis,

Ja no cuiges que mos cors vos trais,

Mas am vos mais que mi ni ren que sia.

Rambaud de Vaqueiras.

XXII, Ja nuls hom pres non dira sa razon

XXII.

Ja nuls hom pres non dira sa razon

Adrechament, si com hom dolens non;

Mas per conort deu hom faire canson:

Pro n' ay d' amis, mas paure son li don,

Ancta lur es, si per ma rezenson

Soi sai dos yvers pres.

Or sapchon ben miey hom e miey baron,

Angles, Norman, Peytavin e Gascon,

Qu' ieu non ay ja si paure compagnon

Qu' ieu laissasse, per aver, en preison;

Non ho dic mia per nulla retraison,

Mas anquar soi ie pres.

Car sai eu ben per ver, certanament,

Qu' hom mort ni pres n' a amic ni parent,

E si m laissan per aur ni per argent,

Mal m' es per mi, mas pieg m' es per ma gent,

Qu' apres ma mort n' auran reprochament,

Si sai mi laisson pres.

No m meravilh s' ieu ay lo cor dolent,

Que mos senher met ma terra en turment;

No li membra del nostre sagrament

Que nos feimes el Sans cominalment;

Ben sai de ver que gaire longament

Non serai en sai pres.

Suer comtessa, vostre pretz sobeiran

Sal dieus, e gard la bella qu' ieu am tan,

Ni per cui soi ja pres.

Richard Coeur de Lion.

XXI, Un sirventes farai novelh, plazen

XXI.

Un sirventes farai novelh, plazen

Ancmais non fis; non m' en tenra paors

Qu' ieu non digua so qu' aug dir entre nos

Del nostre rey que pert tan malamen

Lai a Melhau, on solia tener,

Qu' el coms li tolh ses dreg et a gran tort,

E Marcelha li tolh a gran soan,

E Monpeslier li cuget tolre antan.

Coms de Tolza, mal guazardon aten

Selh que vos sier, don vey qu' es grans dolors,

Quar de servir tanh qualque guazardos;

Doncs be us servi lo rey Peire valen

Que ab sa gent vos anet mantener,

E mori lai, don fo gran desconort;

Pero aisselhs que foron al sieu dan

Anatz creyssen, e 'l rey Jacme merman.

Al comte dic non aia espaven

De Proensa, qu' en breu aura socors,

Qu' el nostre reys, quar trop n' es coratgos

Que li valha, quan n' aura mandamen

Sai en Chiva; pero ieu 'lh fatz saber

Qu' En Berenguier li a 'l castelh estort,

E ditz que reys que lo sieu vai donan,

Ni s' en torna, fai costuma d' efan.

Comte d' Urgelh, assatz avetz fromen

E civada e bos castelhs ab tors,

Ab que de cor no sias temeros, 

E demandatz al rey tot l' onramen 

De lai d' Urgell que soliatz tener,

E no y guardetz camp ni vinha ni ort;

E si no fagz, ja l' autra sanh Joan

No veiatz vos, s' el mieg non faitz deman.

Bona domna, ie us am tan lialmen

Que, quan no us vey, cuia m' aucir amors,

E quan vos vey, sui tan fort temeros

Que dir no us aus mon cor, tal espaven

Mi pren de vos no us fezes desplazer;

Doncs que farai, dona? qu' en breu sui mort

En dretz d' amor, qu' autra non vuelh ni 'n blan,

E quan vos vey, no vos aus far semblan.

Lo nostre reys assatz a de poder

Mest Sarrazis; mas lai de vas Monfort

Volgra vezer hueimais son auriban

Contra totz selhs qui 'l van d' onor baissan.

Bertrand de Born.

XX, Quan la novella flors par el verjan

XX.

Quan la novella flors par el verjan

Don son vermelh, blanc e vert li brondelh, 

Ab la doussor qu' ieu mov del torn de l' an, 

Cobri mon chant cum fan li autre auzelh; 

Quar per auzelh mi teng en mantas res,

Qu' a amar m' es la gensor qu' anc nasques; 

Amar l' aus ieu et aver cor volon,

Mas non l' aus dir mon cor, ans lo y rescon.

Ieu non sui drutz ni d' amor no m fenh tan,

Qu' el mon domna non razon ni n' apelh

Ni non domney, e si m val atrestan,

Quar lauzengier fals, enoios, fradel,

Mal ensenhat, vilas e mal apres

M' an ab mentir aitan aut entremes

Que fan cuiar que la genser del mon

Mi tenha gai, jauzent e deziron.

Qu' om ses domna no pot far d' amor chan, 

Mas sirventes farai fresc e novelh,

Pos castiar cuion en guerreian

Nostre baron lo senhor de Bordelh;

Qu' el sia francs, savis e ben apres,

Mal l' estara, s' enquer vilas non es,

Que aia gaug quascus, si 'lh li respon,

E no 'ls enoi, si be 'ls ra, o si 'ls ton.

Anta n' aura, s' aissi pert son afan

En Lemozi ont a trag mant cairelh

En tanta tor, tans murs et tant auvan

Fag e desfag, e fondut tan castelh,

E tant aver tolt e donat e mes,

E tant colp dat e receuput e pres,

E tanta fam, tanta set e tan son,

Com el n' a trag d' Agen tro a Nontron.

Rassa, per vos remanon sai claman

En Caersi e sai vas Monsaurel;

Per vostre pro avetz fag lo lur dan,

So m dis N Aimars; e 'l senher de Martelh

E 'N Tallafers e 'N Folcans e 'N Jaufres,

E tug aquilh qu' ab vos s' eron empres,

Non an per vos ges las patz en que son,

Ans ne fan grat al pros comt En Raimon.

Una ren sapchon Breton e Norman

Et Angevi, Peitavi e Manselh,

Que, d' Ostasvalhs entro a Monferran,

E de Roziers entro lai Mirabelh,

No i aura un no 'l veia son arnes;

E pus lo coms o vol, e sos dreg es,

Deman ades la terra Sanh Aimon

Tro la crisma li pauzon sus el fron.

Sirventes, vai a 'N Raimon Gausceran

Dreg a Pinos, que ma razon l' espelh;

Pus tant aut son siey fait e siey deman

De lieys que ten Cabreira e 'l fons d' Urgelh,

A mon fraire en ren gratz e merces

De Berguedan del ric joy que m trames,

Que de gran dol me tornet jauzion,

Quan nos partim amdui al cap del pon.

Gausceran Durtz e son frair' En Raimon

Am atretan cum seron mey segon.

Si cum l' auzel son tug sotz l' Aurion,

Son las autras sotz la gensor del mon.

Bertrand de Born.

XIX, Non estarai mon chantar non esparja,

XIX.

Non estarai mon chantar non esparja,

Pus N Oc e Non a mes foc e trag sanc,

Car gran guerra fai d' escars senhor larc,

Per que m sap bon dels reys, quan vey lur bomba,

Qu' en aion ops pals e cordas e pon,

E 'n sion trap tendut per fors jazer,

E ns encontrem a milliers et a cens,

Si qu' apres nos en chant hom de la gesta.

Colps n' agra ieu receubutz en ma tarja,

E fag vermelh de mon gonfainon blanc;

Mas per aisso m' en sofrisc e m' en parc,

Qu' En Oc e No conois q' un datz mi plomba;

E non es mieus lo senhal ni 'l ranson,

E non puesc luenh osteiar ses aver;

Mas ajudar puesc a mos conoissens,

L' escut al col e 'l capelh en ma testa.

Si 'l reis Felips n' agues ars una barja

Denan Gisorc, o crebat un estanc,

Si qu' a Roam n' intres per forsa el parc

E l' assetges pel pueg e per la comba,

Qu' om non pogues traire breu ses colon,

Adonc sai ieu qu' el volgra far parer

Carle que fon lo sieu meilhor parens,

Per cui fon Polha e Samsuenha conquesta.

Anta l' adutz, e de pretz lo descarja

Guerra seluy que hom non troba franc;

Per que non vuelh lais Caortz ni Caiarc

Mon Oc e Non, pus tan sap de trastomba;

Si 'l reis li do lo thesaur de Chinon,

De guerra a cor et agra en poder;

Tan l' es trebalhs e messios plazens,

Per qu' els amicx e 'ls enemicx tempesta.

Anc naus en mar, quant a perdut sa barja, 

Et a mal temps e vai urtar al ranc,

E cor pus tost d' una sageta d' arc,

E sailh en aut e pueys aval jos tomba,

Non trais tan mal, e dirai vos ben con,

Cum fas per lieys que anc no m volc tener

Jorn ni respieg, termenis ni covens,

Per que mos jois, qu' era floris, bissesta.

Vai, Papiolz, ades tost e correns

A Trasinhac on sias ans la festa,

Di m' a 'N Rogier et a totz sos parens

Qu' ieu no i trob plus ombra ni olm ni resta.

                Bertrand de Born.

XVIII, Miez sirventes vueilh far dels reis amdos,

XVIII.

Miez sirventes vueilh far dels reis amdos,

Qu' en brieu veirem q' aura mais cavailhiers

Del valen rei de Castella 'N Anfos

C' aug dir que ven, e volra sodadiers;

Richartz metra a mueis e a sestiers

Aur et argent, e ten sa benanansa

Metr' e donar, e non vol sa fiansa,

Ans vol guerra mais que cailla esparviers.

S' amdui li rei son pros ni corajos,

En brieu veirem camps joncatz de qartiers,

D' elms e d' escutz e de branz e d' arsos,

E de fendutz per bustz tro als braiers,

Et a rage veirem anar destriers,

E per costatz e per piechz manta lansa,

E gaug e plor e dol et alegransa;

Lo perdr' er granz, e 'l gasainhz er sobriers.

Trompas, tabors, seinheras e penos

Et entreseinhs e cavals blancs e niers

Verrem en brieu, q' el segles sera bos,

Que hom tolra l' aver als usuriers,

E per camis non anara saumiers

Jorn afisatz, ni borjes ses duptansa,

Ni mercadiers qui enga dever Fransa,

Ans sera rics qui tolra volontiers.

Mas s' el reis ven, ieu ai en dieu fiansa

Q' ieu sera vius o serai per qartiers;

E si sui vius, er mi gran benanansa,

E se ieu mueir, er mi grans deliuriers.

Bertrand de Born.

XVII, S' ieu fos aissi senhers e poderos

XVII.

S' ieu fos aissi senhers e poderos

De mi mezeys, que no fos amoros,

Ni no m' agues amors el sieu poder,

Ben feira tan qu' a totz feira saber

Del rey Felip, e quals mortz e quals dan

E quals dols es, quar el be non es pros,

E quar Peyteus vai ab Fransa merman.

E si Richartz pren lebres e leos,

Que non reman per plas ni per boyssos,

Enans los fai dos e dos remaner

Per sa forsa, c' us no s' auza mover,

E cuia ben penre d' aissi enan

Las grans aiglas ab los esmerilhos,

Et ab buzacx metr' austors en soan.

E 'l reys Felips cassa lai ab falcos

Sos passeratz e 'ls petitz auzelhos,

E siey home non l' auzan dir el ver,

Quar pauc e pauc se laissa dechazer

Say a 'N Richart que l' a tolgut oguan

Engolesme, don s' es fagz poderos,

E Toloza qu' el te sobredeman.

E pus per sa terra non es iros,

Membre 'l sa sor' e 'l marit ergulhos

Que la laissa e non la vol tener;

Aquest forfait mi sembla desplazer,

E tot ades que s' en vai peiuran,

Qu' el rey navar a sai dat per espos

A sa filha, per que l' anta i es pus gran.

E s' aissi pert sos dregz entre qu' es tos,

Lay quant er vielhs, en sera vergonhos,

E ja Franses non aian bon esper

Quar an lor tot qu' om sol sai tan temer;

No prezon re lur dig ni lur deman

Sai vas Peiteus, enans s' en fan janglos,

Quan son ensems En Richart e 'N Bertran.

E venram say ab las novelhas flors,

E lur bobans sera de sobr' en jos,

E ja 'N Gasto no ns poira pro tener

Que nos tollan lo mon pres San Sever,

A Rocafort tot quan tolgut nos an,

Si qu' en Peiteus seran nostres brandos

Gent alumatz, si que totz o veiran.

Bertrand de Born.