XVI, Al dous nou termini blanc

XVI.

Al dous nou termini blanc

Del pascor vei la elesta

Don lo nous temps s' escontenta,

Quan la sazos es plus genta

E plus covinens e val mais,

Et hom deuria esser plus guais,

E meiller sabor mi a jais.

Per que m peza quar m' estanc

Qu' ieu ades no vey la festa,

Q' us sols jorns mi sembla trenta

Per una promessa genta

Don mi sors temors et esglais,

E no vuelh sia mieus Doais

Ses la sospeysso de Cambrais.

Pustell' en son huelh o cranc

Qui jamais l' en amonesta,

Que ja malvestatz dolenta

No 'l valra mession genta

Ni sojorns ni estar ad ais,

Tan cum guerr' e trebaill e fais:

So sapcha 'l seinher de Roais.

Guerra ses fuec et ses sanc

De rei o de gran podesta,

Q' us coms laidis ni desmenta,

Non es ges paraula genta,

Qu' el pueys si sojorn ni s' engrays,

E membre li qu' om li retrais

Qu' anc en escut lansa non frais.

Et anc no 'l vi bras ni flanc,

Trencat, ni camba ni testa

Ferit de playa dolenta,

Ni en gran ost ni en genta

No 'l vim a Roam ni en assais,

E ja entro que el s' eslais

Lo reys on pretz non es verais.

Reys frances ie us tenc per franc,

Pus a tort vos fai hom questa,

Ni de Gisort no s presenta

Patz ni fis que us sia genta,

Qu' ab lui es la guerr' e la pais;

E jovens, que guerra non pais,

Esdeve leu flacx e savais.

Ges d' En Oc e No no m planc,

Qu' ieu sai ben qu' en lui no resta

La guerra ni no s' alenta;

Qu' anc patz ni fis no 'lh fon genta,

Ni hom plus voluntiers non trais,

Ni non fes cochas ni assais

Ab pauc de gent ni ab gran fais.

Lo reys Felips ama la pais

Plus qu' el bons hom de Carentrais.

En Oc e No vol guerra mais

Que no fai negus dels Alguais.

Bertrand de Born.

XV, Pus li baron son irat e lor peza

XV.

Pus li baron son irat e lor peza

D' aquesta patz qu' an faita li duy rey,

Farai chanso tal que, quant er apreza,

A quadaun sera tart que guerrey:

E no m' es bel de rey qu' en patz estey

Dezeretatz, e que perda son drey,

Tro 'l demanda que fai aia conqueza.

Ben an camjat honor per avoleza,

Segon qu' aug dir, Berguonhon e Francey;

A rey armat ho ten hom a flaqueza,

Quant es en camp e vai penre plaidey;

E fora mielhs, par la fe qu' ieu vos dey,

Al rey Felip que mogues lo desrey

Que plaideyar armat sobre la gleza.

Ges aital patz no met reys en proeza

Cum aquesta, ni autra no l' agrey,

E non es dregz qu' om l' abais sa riqueza,

Que Yssaudun a fag jurar ab sey

Lo reys Henrics e mes en son destrey;

E no s cug ges qu' a son home s' autrey, 

Si 'l fieu d' Angieu li merma una cresteza.

Si 'l rey engles a fait don ni largueza

Al rey Felip, dreg es qu' el l' en mercey,

Qu' el fetz liurar la moneda engleza,

Qu' en Fransa 'n son carzit sac e correy;

E non foron Angevin ni Mansey,

Quar d' esterlins foro ill primier conrey

Que descofiron la gent Campaneza.

Lo sors Enrics dis paraula corteza,

Quan son nebot vi tornar en esfrey,

Que desarmatz volgr' aver la fin preza,

Quan fon armatz no volc penre plaidey;

E no semblet ges lo senhor d' Orley

Que dezarmatz fon de peior mercey

Que quant el cap ac la ventalha meza.

Ad ambedos ten hom ad avoleza

Quar an fag plait don quecs de lor sordey;

Cinc duguatz a la corona francesa,

E dels comtatz son a dire li trey;

E de Niort pert la rend' e l' espley,

E Caercins reman sai a mercey,

E Bretanha e la terra engolmeza.

Vai, Papiol, mon sirventes adrey

Mi portaras part Crespin e 'l Valey

Mon Izembart, en la terra d' Arteza.

E diguas li m qu' a tal domna sopley

Que jurar pot marves sobre la ley

Que 'l genser es del mon e 'l pus corteza.

Bertrand de Born.

XIV, Quan vey pels vergiers desplegar

XIV.

Quan vey pels vergiers desplegar

Los sendatz gruecx, indis et blaus,

M' adoussa la votz dels cavaus,

E il sonet que fan li joglar

Que viulan, de trap en tenta,

Trompas e corns e grailles clar;

Adoncs vuelh un sirventes far

Tal qu' el coms Richartz l' entenda.

Ab lo rey mi vuelh acordar

D' Aragon, e tornar en paus,

Mas trop fon descauzitz e braus,

Quan venc sai per nos osteiar;

Per qu' es dregz qu' ieu lo 'n reprenda,

E dic o per lui castiar;

E peza m si 'l vey folleiar:

E vuelh que de mi aprenda.

Ab mi 'l volon tug acuzar;

Q' us mi comtet de sos vassaus

Que de Castelhot ac mal laus,

Quan ne fes N Espaignol gitar,

E no m par que si defenda

Ves elh, si l' en auza proar,

E quan intret per covidar,

Conquerrec lai pauc de renda.

Hueymais non li puesc ren celar,

Ans li serai amicx coraus;

Guastos, cui es Bearns e Paus,

Mi trames sai novas comtar,

Que de sos pres pres esmenda

Del rey, qu' els i degra liurar,

E volc en mais l' aver portar

Que hom totz sos pres li renda.

Que so m' an dig de lui joglar

Qu' en perdon an fag tot lur laus

E s' anc det vestirs vertz ni blaus,

Ni lur fes nulh denier donar;

Lag l' es qu' om l' en sobreprenda, 

Que d' un sol s' en saup tot pagar 

D' Artuset, don fai a blasmar,

Qu' als Juzieus lo mes en venda.

Peire joglar saup mal pagar

Que 'l prestet deniers e cavaus,

Que la vielha, cui Fontevraus

Atent, lo fes tot pesseiar,

Qu' anc l' entresenh faitz ab benda

De la jupa del rey d' armar,

Que ilh baillet, non lo poc guizar,

Qu' om ab coltelhs tot no 'l fenda.

Peire Roys saup devinar

Al prim qu' el vi jove reyaus,

Que dis no seria pros ni maus,

E parec be al badalhar:

Reys que badal ni s' estenda,

Quan aug de batalha parlar

Sembla o fassa per vaneiar,

O qu' en armas non s' entenda.

Ieu lo perdo, si m fe mal far

A Catalans ni a Laraus,

Car lo senher cui es Peitaus

Lo i mandet, non auset als far;

E reys que logier atenda

De senhor, be 'l deu afanar,

Et el venc sa per gazagnar

Mais que per autra fazenda.

Voill sapcha 'l reys et aprenda 

De son grat, e fassa chantar

Mon sirventes al rey navar,

E per Castelha l' estenda.

Bertrand de Born.

XIII, Greu m' es deisendre carcol,

XIII.

Greu m' es deisendre carcol,

E sapchatz que no m' es belh,

Quar anc assaut ni sembelh

No vim passat a un an,

E tenh m' o a gran afan,

Quar ilh estan per paor,

L' autre et ieu per s' amor

Del senhor de Molierna.

Qu' els aguza e 'ls esmol

E 'ls toca coma coutelh

Lo senher cui es Bordelh,

Mas trop son espes denan

E mols deves lo trenchan;

E plus leyal d' un Prior,

Merces a l' esmoledor,

Ben venran a vita eterna.

Ja 'N Bernart de Mostairol,

Ni 'N Guillem de Monmaurelh

Non agran cor tan isnelh

Com nostre baro quad an,

Quan son a l' yvern intran;

E quan son a la calor

Torna l' arditz en paor,

Quan lo clar temps s' esbuzerna.

Del senhor de Mirandol

Qui ten Crueissa e Martelh

No cug qu' onguan si revelh;

Tro que veia que faran

Frances que van menassan;

Mas no son tan guabador

Be non atendo 'l pascor,

Qu' onguan mais plou et yverna.

Aragones fan gran dol

Catalan e silh d' Urgelh,

Quar non an qui los capdelh

Mas un senhor flac e gran,

Tal que s lauza en chantan,

E vol mais deniers qu' onor,

E pendet son ansessor,

Per que s destrui e s' enferna.

Lai vir on la dens me dol,

Vas sella de cui m' es belh,

Qu' ieu la repte e l' apelh

De trassio o d' enjan,

Quar per son leugier talan

Sofre que 'l fals fenhedor

Se van fenhen de s' amor

De leys cui bos pretz governa.

Ieu sai un austor tersol

Mudat, qu' anc no pres auzelh,

Franc e cortes et isnelh,

Ab cui ieu m' apelh Tristan;

E per aquelh eys semblan

A m pres per entendedor,

Et a m dat mais de ricor

Que si m fes rey de Palerna.

Tristan, per la vostr' amor

Me veyran torneyador

En Peytau, qui que m n' esquerna.

Puois la regina d' amor

M' a pres per entendedor,

Ben puesc far cinc et ill terna.

Bertrand de Born.

XII, Pus lo gens terminis floritz

XII.

Pus lo gens terminis floritz

S' espandis jauzions et gais,

M' es vengut en cor que m' eslais

De far un novel sirventes

On sapchon li Araguones

Qu' ab mal agur,

D' aquo sion ben tug segur,

Sai venc lo reys dont es aunitz

E siei soudadier loguaditz.

Sos bas paratges sobreyssitz

Sai que fenira coma lais,

E s tornara lai don es trais

A Meillau et en Carlades;

Quan quecx n' aura son dreg conques,

An s' en ves Sur;

Greu er que en mar no 'l debur

L' aura, quar tant es pauc arditz,

Flacx e vans e sojornaditz.

Proensa pert dont es issitz,

Que son frair Sancho prezon mais,

Qu' el non a suenh mas que s' engrais

E beua per Rossilhones,

On fo dezeretatz Jaufres,

Qu' a Vilamur

E 'n Tolza 'l tenon per perjur

Tuit cill ab cui s' era plevitz,

Quar los a per paor gequitz.

Lo reys cui es Castrassoritz

E ten de Toleda 'l palais

Lau que mostre de sos essais

Say al fill del Barsalones,

Quar per dreg sos malvatz hom es;

Del rey tafur

Mais am sa cort e son atur,

Non fauc selha don fui trahitz

Lo jorn qu' el fon per mi servitz.

Lo bos reys Gartsia Ramitz

Cobrera, quan vida 'l sofrais,

Aragon qu' el monges l' estrais;

E 'l bos reys navars, cui dreitz es,

Cobrara ab sos Alanes,

Sol s' i atur:

Qu' aitan cum aurs val mais d' azur,

Val mil tans et es plus complitz

Sos pretz que del rey apostitz.

Per selha de cui es maritz,

Per la bona reina m lais;

E des que m dis so don m' apais,

Berenguier de Bezaudunes

Li retraissera, s' il plagues;

Mas tot rencur

Sos malvatz faigz que son tafur,

Quar per el fo mortz e trahitz,

Don es sos linhatges aunitz.

Mout trahic lag l' emperairitz

Com fals reys perjurs e savais,

Quan pres a quintals et a fais

L' aver que Manuels trames,

E det l' a son frair' En Jacmes;

Pueys ab cor dur,

Quan n' ac pres lo vert e 'l madur,

El ne menet per mar marritz

La domna e 'ls Grecx qu' el ac trahitz.

Bertrand de Born.

XI, Gent fai nostre reis liouranda,

XI.

Gent fai nostre reis liouranda,

Per so son tuit gras

Sei Engles e nou e ras,

E chascus porta guirlanda;

E Frances son rusillos

De portar lurs garnisos,

E suefron set e fam e pluia e ven;

E 'l reis conquier l' autrui, e 'l sieu defen.

Reis que gran terra demanda

Par que fassa gas,

Quan caval non trai del pas

Ni calsas de fer non randa;

Ben fe 'l reis qu' es corajos

Quan venc sai entr' els Bretos, 

Mas la honors tornara en nien,

S' es tals la fis com fes comensamen.

Guerra vol c' om sanc espanda

E c' om fuec n' abras,

E que ja non sia las

De donar ni metr' a ganda;

Qu' ieu sai fraires aitals dos,

L' us es reis, l' autr' es coms pros:

Mas ges no ditz vertat aicel que men,

Ni tuit lauzat no son pro ni valen.

Al valen rei, qu' el gen blanda,

Sirventes, diras

Qu' enans que passes lo pas

Gard ben si l' es foudatz granda,

Si l' es sens o dans o pros;

Car per seinhor durmilhos

Non voill intrar en guerra ni en conten,

Car greu conquier hom ben terra en durmen.

Breton son fors de garanda

E son d' onor bas,

Car anc hom de San Thomas

N' intret en Breselianda;

Ben paron de bon cor blos

E tornat de sus en jos,

Car lor Artus demandon freuolmen;

Non dirai plus, car negus no m' enten.

Sirventes, vai t' en cochos

Al comte qu' a nom N Ugos,

Car el val tan e ve e sap e sen

Que ja no vol penre malvatz argen.

Bertrand de Born.

X, Ieu chan, qu' el Reys m' en a preguat

X.

Ieu chan, qu' el Reys m' en a preguat 

A l' auzen de mon menassat

De l' afar d' aquesta guerra, 

D' aquest juec que vey entaulat, 

E sabrem, quan l' auran joguat, 

Dels quals dels filhs er la terra.

Tost l' agra 'l Reys joves matat,

Si 'l coms no 'l n' agues essenhat,

Mas aissi 'ls clau e 'ls enserra

Qu' Engolmes a per fort cobrat,

E tot Centonge desliurat

Tro lai part finibus terra.

Si 'l coms pot far sa voluntat

Que no 'l vendon cyst afiat,

Ni del tot si dezenferra;

Qu' anc cynglar no vim pus irat,

Quan l' an brocat ni l' an cassat,

Qu' elh er mai sos cors non l' erra.

De mos senher lo Rey annat

Conosc que an siey filh peccat,

Que del sojorn d' Anglaterra

L' an ahoras dos ans lunhat,

Del tot lo 'n tenh per enguanat

Mai quan de Johan Ses Terra.

Li guazan si son acordat

Entr' elhs e ves lui revelat,

Com aissilh de Lombardia;

Mai volon esser be menat

Per rey que per comte forsat,

D' aitan lur en trac guarentia.

Aquest juec tenc per guazanhat

Deves vos e per envidat,

Que dels pezos de valia

Avem l' estachier desliurat,

Que tug n' aneron esfredat

Ses comjat, q' us non prendia.

En Lemozi fon comensat,

Mas de sai lur es afinat,

Qu' entre Fransa e Normandia,

Ves Giortz e ves Nuovmercat,

Vuelh qu' en auion cridar: “Arrat 

E Monjoy e deus aia.”

 

Lo sen venserem ab foudat

Nos Lemozin et envezat

Que volem qu' om do e ria;

Qu' els Normans en son enviat,

E dizon, si s n' eron tornat,

Q' uns mais d' elhs sai non venria.

Lo Rey tenc per mal cosselhat

De Fransa e per piegz guizat,

Car vey que sos fagz estanha

Que 'l valrion mais daurat;

E si no val a son conhat,

Sens e pretz tem que 'l sofranha.

Frances, si com es abdurat

Sobre totz e li plus prezat,

Paresca q' us non remanha

Companh qu' el Reys aia mandat; 

Que jamais no seretz prezat, 

Si non etz en la mesclanha.

Lo dux de Berguonh' a mandat

Qu' el nos ajudara l' estat

Ab lo secors de Campanha,

On venran tals cinc cens armat

Que, quan tug serem ajustat,

Non er Peitieus no s' en planha.

Reys qui per son dreg si combat

A mielhs dreg en sa eretat;

E quar conqueret Espanha

Karles, n' a hom tos temps parlat,

Qu' ab trebalh et ab larguetat

Conquier Reys pretz e 'l guazanha.

Senhe' 'N Rassa, aquest comtat

Vos cresca 'l Reys ab Bretanha.

Lo Reys joves s' a pretz donat

De Burcx tro qu' en Alamanha.

Bertrand de Born.

IX, Ges no mi desconort S' ieu ai perdut,

IX.

Ges no mi desconort

S' ieu ai perdut,

Qu' ieu non chant e m deport,

E non m' aiut

Com cobres Autafort

Qu' ieu ai rendut

Al senhor de Niort,

Car la volgut;

E pois en merceian

Li sui vengutz denan,

E 'l coms en perdonan

M' a receubut baisan;

Ges no i dei aver dan,

Qui qu' en dises antan,

Ni lausengier non blan.

Vas mi son perjurat

Trei palazi,

E 'l quatre vescomtat

De Lemozi,

E li dui penchenat

Peiragorzi,

E li trei comte fat

Engolmezi,

E 'N Sestols ab Gasto,

E tuit l' autre baro

Que m feron plevizo,

E lo coms de Dijo,

E Raimons d' Avigno,

Ab lo comte breto,

Et anc uns no m tenc pro.

Si 'l coms m' es avinens

E non avars,

Mout li serai valens

En sos afars,

E fis com fins argens,

Humils e cars;

E 'l coms sega lo sens

Que fai la mars,

Quan ren i chai de bo

Vol ben qu' ab lieis s' esto,

E so que no 'l te pro

Gieta fors el sablo;

Qu' aissi s tainh de baro

Que fassa son perdo,

E s' el tol que pois do.

 

Ses pro tener amic

Tenc per aital

Com fas mon enemic

Que no m fai mal; 

Qu' en un mostier antic 

De San Marsal

Mi jureron mant ric

Sobr' un missal;

Tals mi plevic sa fe

Non feses patz ses me,

Qu' anc pois no m' en tenc re,

Ni li sovenc de me,

Ni 'll membret mas de se,

Qant si mes a merce;

E non estet ges be.

Lo comte vueill pregar

Que ma maiso

Mi comant a gardar,

O que la m do;

Q' ades mi son avar

Tut sist baro,

Q' ab els non puosc durar

Ses contenso;

Ara mi pot cobrar

Lo coms ses mal estar,

Et ieu vas lui tornar

E servir et onrar;

E non o volgui far,

Tro c' al dezamparar

Sui vengutz d' En Aimar.

Ma bella Esmenda s gar

Hueimais de sordeiar,

Que ja per meilhurar

Non la cal trebailhar;

Qu' el mon non sai sa par

De joi ni de parlar

Ni de bell domneiar.

Domna, ab cor avar

De prometr' e de dar,

Pois no m voletz colgar,

Donasses m' un baisar;

Aissi m podes ric far

E mon dan restaurar,

Si dombres dieus mi gar.

Papiol, mon chantar

Vai a mi dons contar;

Per amor d' En Aimar

Mi lais de guerreiar.

Bertrand de Born.

VIII, Rassa, mes se son primier

VIII.

Rassa, mes se son primier

En la fin que an parlada

Li senhor e 'l mainadier

E 'ls baros d' est' encontrada,

Sels an fag vas vos passada;

Et ieu qual mal vos en mier,

Que terra non ai cobrada?

Totz temps mi laisson derrier, 

Quan m' an mes en la mesclada, 

Li gentil et li lanier;

E quan lur patz es parlada,

Ni m' an ma terr' abrazada,

Dizon silh del Colombier

Qu' en prenda dreg, si m' agrada.

Nos em tal trenta guerrier,

Quascus ab capa traucada,

Tug senhor e parsonier,

Ab cor de guerra mesclada,

Qu' anc non aguem denairada,

Ans als colps, quan es mestier,

An lor querella prestada.

Hueymais seran ric portier

Que tenran porta serrada,

E sabran arcbalhestier

Qu' es la patz en l' encontrada,

Qu' om non lor dara soudada,

Ans auran can e lebrier

Del comt e s' amor privada,

Austor e falcon gruier,

Corn e tabor encuirada,

E braquet e liannier,

Arc e sageta barbada,

Gannacha e capa folrada

Et ozas de salabier

Seran mais de lur mainada:

Sercat ai, de Monpeslier

Tro lai en la mar salada,

Que no y truep baron entier

Qu' aya proeza acabada,

Qu' el mieg luoc non sia oscada

O fracha en l' un cartier;

Ni mas un no m' i agrada.

Papiol, ten drech sentier,

Non temas ven ni gelada;

Digas mi a mon Rainier

Que sa proeza m' agrada.

        Bertrand de Born

VII, Lo coms m' a mandat e mogut,

VII.

Lo coms m' a mandat e mogut,

Per En Ramon Uc d' Esparro, 

Qu' ieu fassa per lui tal canso

Qu' en sion traucat mil escut,

Elms et ausbercx et alcoto,

E perpong falsat e romput.

Et es luecx que sia atengut,

Pus mi fai comtar sa razo,

E qu' enans de la roazo

O aia 'l coms aperceubut,

Que blasmarion m' en Guasco,

Que de lor mi tenh per tengut.

A Toloza, part Montagut,

Plantara 'l coms son guonfaino

Al prat comtal, josta 'l peiro;

Quan lay aura son trap tendut,

Nos alogerem d' enviro,

Si que tres nuegz hi jairem tut.

E desse que serem vengut,

Mesclara 'l torneys pel cambo,

E Catalas e ill d' Arago

Tombaran soven e menut,

Que non lur tenran pro arso,

Tan grans colps hi ferrem nos drut.

E no pot esser remazut

Que vas cel no volon tronso,

E que sendat e sisclato

E samit no sion romput,

Cordas e becas e paysso

E traps e pavaillo perdut.

E seran hi ab nos vengut

Las poestatz e li baro,

E tug li honrat companho

Del mon e li plus elegut,

Quar per aver e per somo

E per pretz hi faran aiut.

Lo reys qu' a Tarascon perdut,

E 'l senher de Montalbeo

Rogiers, e 'l filh Bernart Otho,

E 'l coms Don Peire lor n' aiut,

Lo coms de Foys, e 'N Bernado,

E 'n Sancho, frair' al rey vencut.

De lai penson de guarnizo,

Que de sai lur er atendut.

Totz temps vuelh que li ric baro 

Sion entre lor irascut.

Bertrand de Born.

VI, D' un sirventes no m qual far longor ganda,

VI.

D' un sirventes no m qual far longor ganda, 

Tal talent ai qu' el digua e que l' espanda, 

Quar n' ai razon tan novella e tan granda 

Del jove rey qu' a fenit sa demanda

Son frair Richart, pus sos pairs lo y comanda, 

Tant es forsatz!

Pus En Enrics terra non te ni manda,

Sia reys dels malvatz.

Que malvatz fai quar aissi viu a randa,

A liurazon, a comte et a guaranda;

Reys coronatz, que d' autrui pren liuranda,

Mal sembla Arnaut lo marques de Bellanda

Ni 'l pros Guillem que conquis tor Miranda,

Tan fon prezatz!

Pus en Peitau lur ment e lur truanda,

No y er mais tant amatz.

Ja per dormir non er de Coberlanda,

Reys dels Engles, ni non conquerra Yrlanda,

Ni ducx clamatz de la terra normanda,

Ni tenra Angieus ni Monsaurelh ni Canda,

Ni de Peitieus non aura la miranda,

Ni coms palatz

Sai de Bordelh, ni dels Gascos part landa

Senhers ni de Bazatz.

Cosselh vuelh dar el so de N' Alamanda,

Lai a 'N Richart, sitot non lo m demanda;

Ja per son frair mais sos homes no blanda,

No com fai elh, ans asetja e 'ls aranda,

Tolh lur castelhs e derroqu' et abranda

Deves totz latz;

E 'l reys torn lai ab aiselhs de Guarlanda

E l' autre sos conhatz.

Lo coms Jaufres cui es Breselianda

Volgra fos primiers natz,

Car es cortes, e fos en sa comanda

Regismes e duguatz.

Bertrand de Born.

V, Un sirventes fatz dels malvatz barons,

V.

Un sirventes fatz dels malvatz barons,

E jamais d' els no m' auziretz parlar;

Qu' en lor ai fraiz mais de mil agulions,

Anc non puoic far un correr ni trotar;

Ans se laissen ses clam deseretar.

Maldiga 'ls dieus! e que cuian doncs far

Nostre baron? C' aissi com us confraire

No i es uns no 'l poscatz tondr' e raire,

O ses congrenz dels quatre pes ferar.

Lous e 'N Aimars, N Aquenbautz e 'N Guions 

Degran oimai lor joven demostrar,

Quar joves rics cui non platz messios,

Cortz ni guerra, non po en pretz montar,

Ni s fai temer ni grazir ni onrar;

Que de Londres tro qu' a la ciutat d' Aire

Non i a un qu' en la terra son paire

No ill faisson tort, senes tot caloingnar.

Bertrand de Born.

IV, Pus Ventedorn e Comborn e Segur

IV.

Pus Ventedorn e Comborn e Segur

E Torena e Monfort e Guordon

An fag acort ab Peiregorc e jur,

E li borges si claven d' eviron,

M' es bon e belh hueymais qu' ieu m' entremeta

D' un sirventes per elhs aconortar,

Qu' ieu no vuelh ges sia mia Toleta

Per qu' ieu segurs non i pogues estar.

A! Puiguillems e Clarens e Granolh

E Sanh Astier, molt avetz gran honor,

Et ieu mezeis qui conoisser la m vol,

Et a sobrier Engolesmes maior,

Qu' En charretier que gurpis sa charreta

Non a deniers ni no pren ses paor;

Per qu' ab onor pretz mais pauca terreta

Q' un emperi tener a dezonor.

Si 'l rics vescoms qui es caps dels Guascos,

A cui apen Bearns e Gavardans,

E 'N Vezias o vol e 'N Bernardos

E 'l Senher d' Ayx e selh cui es Marsans,

D' aquelha part aura 'l coms pro que fassa,

Et eissamen aissi com el es pros,

Ab sa gran ost que atrai et amassa,

Venha s' en sai et ajoste s' ab nos.

Si Talhaborcs e Pons e Lezinhans

E Malleons e Taunais fos en pes,

Et a Siurac fos vescoms vius e sans,

Ja non creirai que non nos ajudes

Selh de Toartz; pois lo coms lo menassa,

Venha s' ab nos, e non sia ges vans,

E demandem li tro que dreg nos fassa

Dels homes qu' el nos a traitz d' entr' els mans.

Entre Peitau e la ylha 'n Bocart

E Mirabelh e Laudun e Chino,

A Claraval an bastit, ses regart,

Un belh caslar el mieg d' un plan cambo;

Mas no vuelh ges lo sapcha ni lo veya

Lo joves reys, que no ill sabria bo,

Mas paor ai, pus aitan fort blanqueya,

Qu' el lo veira ben de Matafelo.

Del rey Felip veirem be si panteya,

O si segra los usatges Karlo;

D' En Talhafer, pus so senher l' autreya

D' Engolesme, et elh l' en a fag do;

Quar non es bo de so que reys autreya, 

Quant a dig d' oc, que pueys digua de no.

Bertrand de Born.

III, Ges de far sirventes no m tartz,

III.

Ges de far sirventes no m tartz,

Ans lo fas senes totz afans,

Tan sui suptils d' engenhs e d' artz

Que m sai gardar de totz engans;

E sai tan de sort

Que vec vos m' estort;

Que 'l comte ni 'l rey

No m forfeiron rey.

E pois lo reys e 'l coms Richartz

M' an perdonat lurs mals talans,

Jamais Guirautz ni 'N Audoartz

No m don treguas ni 'n Talairans,

Ni ja d' Autafort

Non laissarai ort,

Qui s vol m' en guerrey,

Pus aver lo dey.

Quant es fis deves totas partz

A mi resta de guerra uns pans,

Pustella en son huelh qui m' en partz,

Sitot m' o comensiey enans;

Patz no m fai conort,

Ab guerra m' acort,

Qu' ieu non tenh ni crey

Negun' autra ley.

E no y guart dilus ni dimartz,

Ni setmana, ni mes, ni ans;

Ni m lais, per abril ni per martz,

Qu' ieu non cerque cum venha dans

A sels que m fan tort;

Mas ja, per nuill sort,

No y conquerran trey

Lo pretz d' un correy.

Quals que fassa sos bos yssartz,

Ieu m' en sui mes tos temps engrans

Cum puesca aver cairels e dartz,

Elms et ausbercs, cavals e brans;

Qu' ab aisso m cofort,

E m trac a deport

Assaut e torney,

Donar e domney.

Mos parsoniers es tan gualartz

Que vol la terr' a mos enfans,

Et ieu vuelh li 'n dar, tan sui guartz;

Pueys diran que mals es Bertrans,

Quar tot non lo y port;

Mas a malvat sort

Venra, so us autrey,

Quals qu' ab mi plaidey.

Jamais d' Autafort

No fas dreit ni tort,

Qui s vol m' en guerrey,

Pus aver lo dey.

Lo jutjamen crey

Mon senhor lo rey.

Bertrand de Born.