L, Mout fort me sui d' un chan meravillatz

L.

Mout fort me sui d' un chan meravillatz

Per lui qu' o fetz sitot es dreigz que m plaia,

Quar cel que es vailhenz ni enseingnatz

Deu ben pensar e gardar que retraia;

Quar nienz es q' om razonar pogues

Lo tort per dreig que 'ls pros no s conogues; 

E poda leu perdre mon escien

Son pretz aicel qui tort adreg defen.

Doncs, si ben fos premiers aconseilhatz,

Pueis d' escondir Genoes tant s' asaia,

Non crei qu' el chant agues mainz motz pauzatz

Qui membrar fan lor sobremortal plaia,

Que l' autreia c' abatutz e mespres

Totz lor affars pels Venecians es;

E l' uchaizos, qu' en pauz' en lur conten,

Non pot donar contra 'l mal guarimen.

Car hom non deu de ren esser blasmatz,

Si 'l fai co i s taing, n' es dreg que mal l' en chaia,

Doncs pueis tant gen gerreian ses guidatz,

No m par qu' en re lur descortz nogut n' aia;

C' anc al jostar no fo nuilh temps que res

Mas arditz cors failliment lor fezes,

Car il foron totas vez mais de gen

Gent acesmat e per un dos soven.

E l' auch retrair qu' il tengron afrenatz

Venecians, ja qu' era lor meschaia,

Mas cum ancse fon lur poders doptatz

Pelz Genoes, no s membre no il desplaia,

Qu' un de lor naus mena uns sols tres pres,

Mas escondir pogra meills per un tres,

C' anc non preiron Venecian conten

Non aguesson lauzor al fenimen.

Mas s' el volgues semblar enrazonatz,

Non degra pas dir razon tant savaia,

Ni que trei flac valgron trenta prezatz;

Pero dels tres no m par respos s' eschaia,

Don ieu m' enpas e dic so qu' es pales,

Que quant es meills als Venecians pres,

Adoncs reignon plus cortes d' avinen,

E no s' en van en re desconoissen.

Oimais mi par que ben sia quitatz

D' aisso qu' a dich, e, s' el no s' en apaia,

De Venecians, queira 'ls lor faitz honratz

E 'ls grans conquistz faitz ab valor veraia;

E cum eran vencutz los Genoes,

Et en anta l' emperador grec mes,

E jutgara pueis s' ill valon nien,

Qu' ieu non ai plus de respondre talen.

Valens domna, qu' en cel pais regnatz,

Per cui plaidei, pros e plazens e gaia,

Merce vos clam, qu' a mi valer deiatz,

Que tot quant auch ni vei lo cor m' esmaia,

E sui tant fort de vostr' amor empres

Que, si no vei vostre gai cors cortes,

Viure non puesc, so sapchatz veramen,

C' ab lo respeig que ieu n' ai muer viven.

Venecian, qui ditz que il Genoes

Vos an faitz dan ni us an en dolor mes,

Vostr' onrat prez non sap ni 'l dan coren

Que lor avez fait d' aver e de gen.

Bonifaci Calvo, mon sirventes

Vos man, e us prec qu' el dir no us enuei 'l ges, 

Quar del taisser grat cortezia m ren,

E maiormenz dels Genoes l' enten.

Barthélemi Zorgi. 

XLIX, Entre dos reis vei mogut et enpres

XLIX.

Entre dos reis vei mogut et enpres

Un novel plait c' adutz guerr' e mesclaigna,

Costas d' aver e trebaill, com que peis

Bruit e resson et esfortz e compaigna,

Car Conratz ven qu' es mogutz d' Alamagna,

E vol cobrar, ses libel dat ni pres,

So qu' a conquis Carles sobr' els Poilles;

Mas non er faitz que fer e fust non fraingna

E caps e bratz, enanz qu' el plaitz remaigna.

Qu' en breu veirem descargar rics arneis,

Tendas e traps fermatz per la campaigna,

E mainz baros conseillar pels defes,

Per que l' afars s' enanz' e no s' afraigna;

Aissi veirem de mainta terra estraigna

Venir faiditz soudadiers e borges

E messatgiers e privatz e pales,

Et en la ost veirem solatz e laigna

E 'ls berrouier soven correr la plaigna.

Trombas, tabors, sonaills, genz e peitrals,

E cavalliers encoratz de contendre

Veirem en cham, e penons e seignals

E rencs d' armas aiostatz escoissendre,

E mains cairels desclavar e destendre,

E critz e plors e braitz e dols corals

Poirem auzir, e per plans e per vals,

E mainz destriers pres ses dar e ses vendre,

E 'ls reis intrar en l' estor ses atendre.

Lai on seran las seigneiras reials,

Veirem escutz et elms macar e fendre,

Trencar ausbercs e sentir colps mortals,

E troncs e lans, e ferir e defendre,

E s' al plus fort camp intrara per pendre,

Aqui veirem derrocar mainz vassals,

E mainz jazer envers sotz los cavals,

Manz mortz, manz pres, e manz per terr' estendre,

E mainz aucir que no se volra rendre.

L' aigla, la Flors a dreitz tant comunals

Que no i val leis ne i ten dan decretals,

Per que iran el camp lo plait contendre,

E lai er sors qui meills sabra defendre.

Aicarts del Fossat.

XLVIII, Mout a que sovinenza

XLVIII.

Mout a que sovinenza

Non agui de chantar,

Mas ar m' en sove, car

Aug sai dir e comdar

Qu' el nostre reis breumenz,

Cui que pes ni s n' azir,

Vol en Gascoign' intrar

Ab tal poder de genz

Que murs ni bastimenz

Non o puesca suffrir.

E car ai entendenza

Qu' el vol faig comensar

Don poiran luec cobrar

Armas e coindeiar,

Sui tan gais e jauzenz

Q' eu non penz ni consir

Mas de joi, e de far

So per que tost comenz

Lo francs reis e valenz

Ab ferm cor de complir.

Per que chantan m' agenza

Sa gran valor sonar,

Car comenz sens tardar

De sos dreitz demandar

Tant afortidamenz

Que, sens tot contradir,

Li Gascon e il Navar

Fasson sos mandamenz,

E los liur' a turmenz

Ab prendr' et ab aucir.

Veiam lo, sens bistenza,

Dreig vas els cavalgar

Ab tal esfors qe 'l par

Non pueschan cham trobar,

E lai tan bravamenz

Combatr' et envazir

Murs, tors, e peceiar,

Ardr' e fondr' eissamenz,

Qu' el fa 'ls obedienz

A sa merce venir.

Si que de sa valenza

Fassa 'ls meillors parlar,

E pel paire semblar

Si deu mout esforzar,

Car fon plus avinenz,

E mais sap conquerir,

E mais si fetz honrar

Que reis c' anc fos vivenz,

Car si no 'l sembl' o 'l venz

Pro hi aura que dir.

Mas res no m fai duptar

Qu' el no 'l vencha breumenz,

Tant es granz sos talenz

De son pretz enantir!

Reis Castellanz, pueis ar

No us fait poders ni senz,

E dieus vos es consenz,

Pensaz del conquerir.

Boniface Calvo.

XLVII, Ges no m' es greu s' eu non sui ren prezatz

XLVII.

Ges no m' es greu s' eu non sui ren prezatz

Ni car tengutz entr' esta gen savaia

Genoeza, ni m platz ges s' amistatz,

Car no i cab hom a cui proeza plaia,

Mas ab tot so mi peza fort, qu' il es

Desacordanz, car s' il esser volgues

En bon acort, sos grans poders leumen

Sobran a totz cels per cui mal en pren.

Hai! Genoes, on es l' autz pretz honratz

Qu' aver soletz sobre 'l gen? que par qu' aia

Totz vostres faitz decazutz e sobratz

Tan fort que totz vostr' amics s' en esmaia,

Sia 'l descortz q' entre vos es jos mes,

E donatz vos luecs a tornar los fres

En las bochas de cels que, per conten

Q' avetz mest vos, si van desconoisen.

Mas lo contenz es tant mest vos poiatz

Que, s' el non chai, greu er que no us dechaia,

Qu' om vos guerreia, vos vos guerreiatz,

E qui vos venz ar no us cug que 'l n' eschaia

Laus ni bon pretz, car no us platz vostres bes;

Que l' us a gaug, qant a l' autr' es mal pres;

Doncs qui venz tan descabdelada gen

Non fai esfortz don pueg en pretz valen.

E si no fos la follors e 'l pecchatz

Que nais del vostre descort, tals s' asaia

Leumen a far so que mais vos desplatz,

Que us for' aclis, car res tant non esglaia

Vostres gueriers, ni tant lor desplai ges

Com faria 'l vostr' acortz, s' el pogues.

Entre vos tant durar enteiramen

Que poguessetz d' els penre venjamen.

Car il sabon que leger no us donatz,

De vos venjar mostron que lur desplaia

So que pro vetz los avetz mal menatz,

Tant que greu es luecs on hom no 'l retraia,

Que trenta d' els non esperavon tres

De vos, per c' ab pauc non es dieus repres,

Car de tal guiza vos a tout lo sen

Que us sobron cil que no valon nien.

Venecian, ben sapchatz qu' obs vos est

Que si' ab vos dieus contra 'ls Genoes,

Car ab tot so qu' el vos hi val granmen,

Vos an il tout tan q' en vivetz dolen. 

Boniface Calvo.

XLVI, En luec de verjanz floritz

XLVI.

En luec de verjanz floritz

E foillatz,

Volgra per champs e per pratz

Vezer lansas e penos,

Et en luec de chanz d' auzeus

Auzir trompas e flauteus,

E granz retinz de colps e de cridanz; 

C' adoncs fora cabalos lo mazanz.

Bel m' es lo retinz e 'l critz

Dels armatz,

Can sui ben encavalgatz

Et ai bellas garnizos;

C' aitan gai sui et irneus

A l' encontrar dels tropeus, 

Com li privat en chambras e parlanz, 

E tan volgut com il en cochas granz.

Per qu' eu volgra fos partitz

Lo prezatz

Reis N Anfos de sos regnatz,

Qu' adoncs faria dels pros

E dels valenz sos chapdeus;

Qu' en faitz perillos ni grieus

Non ten pro lauzenziers ni sopleianz,

C' al maior ops li fail cors e talanz.

Mas trop mi par endurmitz,

Que m desplatz,

Car en vey desconortatz

Los sieus, e meins corajos;

E s' ara, mentr' es noveus

L' afars, non conorta 'ls sieus,

Venir l' en pot tals mescaps e tals danz 

Qui 'l fara pro, si 'l restaur' en des anz.

Reis N Anfos, ja 'ls crois marritz

Non crezatz,

Ni 'ls feingnenz alegoratz,

Car amon dinz lur maizos

Mais bos vis e bos morseus

C' ab afan penre casteus,

Ciutatz ni reignz, ni faire faitz prezanz, 

Tan lur es cars legors e pretz soanz!

Vai dir, sirventes noveus,

Celleis cui sui miels sieus,

Qu' el bes que m fai es a totz los prezanz

Enantimenz, e als crois desenanz.

Boniface Calvo.

XLV, Un sirventes farai ses alegratge,

XLV.

Un sirventes farai ses alegratge,

E chantarai iratz sobre feunia,

E mandarai, don m' es greu e salvatge,

Lai al comte proensal, on que sia,

Que re no val forsa ses ardimen

Ni honratz pretz ses gran afortimen,

Ni pot complir nulh bon comensamen,

Quan failh lai cor ont ajudar deuria.

Ben aia coms qu' es d' afortit coratge

E coms quan leu de cor no si cambia,

E pueys gran be quant egal son linhatge

Mante son pretz que deshonratz non sia;

Ben aia ieu e ma dona eissamen,

E ben Blacatz, quar en valor enten,

E ben lo coms proensals, quar tan gen

A defendut so que conquist avia.

Mais non pessetz de bruyt ni de barnatge,

Coms, derenan quar hom no vos creiria;

Sabetz per que? qu' a mortal volpilatge

Vos ten hom so que fezetz l' autre dia,

Don sui iratz e n' ai lo cor dolen,

Quar tan laissetz Marcelh' aunidamen,

Quar non yssitz trompan o combaten,

O quar sivals no vist qui us combatia.

Comte sai ieu plazen, de belh estatge,

Que totz lo mons l' acuzav' e 'l corria,

Que a vencut e restaurat paratge,

Gaug e solatz e pretz que si perdia;

E sapchatz be que non o fetz fugen,

Ans o a fag donan e combaten,

Aissi cum selh que a cor e talen

De far los faitz qu' el reys Richartz fazia.

Coms de Tolza, lo destric e 'l dampnatge,

L' anta e 'l dan que lo Baus sai prendia

Avetz vencut per vostre vassalhatge,

E restaurat per vostra galhardia,

Quar vos etz coms de valor e de sen,

E coms de joy e coms d' abelhimen,

E coms honratz sobre tot' autra gen,

E coms de pretz e de cavalairia.

Coms de Rodes, ab cor et ab talen

Devetz aver proeza et ardimen,

Quar pretz aura totz temps restauramen

En vostra cort, quant alhors si perdria.

Bertrand d' Alamanon.

XLIV, Ja de chantar nulh temps no serai mutz,

XLIV.

Ja de chantar nulh temps no serai mutz,

Pus la belha de qu' ieu sui enveyos,

A cui mi suy de leyal cor rendutz,

No vol ni 'l plai qu' ieu estey cossiros;

E pus ilh a de pretz la senhoria

E de beutat part totas las plazens,

Non dey passar en re sos mendamens,

Ni o fis anc ni farai ni o faria.

De mon senhor sitot fan grans lo brutz

De demandar sos dreitz e sas razos

A las ciutatz, leu s' en es retengutz;

Per so ditz hom que silh n' estai duptos,

Quar son lassat et an fait companhia,

E no calgra duptar lurs nozemens,

Quar negun, las! no pot esser tenens

Nozatz a tort, quar lo dreitz lo deslia.

Leu pot hom dir que, s' ieu en fos crezutz,

Ja no fora remazuda per nos

Esta guerra, pus qu' els faitz son mogutz;

Mas pus hi fon Marcelh' et Avinhos,

E nos fezem lo piegz qu' om far podia,

Que quan degram mais far d' afortimens,

Nos alonguem los mil marcx humilmens,

E no 'ls degram alonguar un sol dia.

Mas est afar vey qu' er leu retengutz,

Que de Fransa es vengutz lo ressos,

Que mos senher s' en es tant irascutz

Que tug dizon qu' el n' a levat la cros,

E vol passar en terra de Suria;

Guardatz s' o fai ben ni adrechamens,

Que so que pert de sai aunidamens,

Vol demandar ad aquels de Turquia.

Quar plus soven no s vira mos escutz

Lai ves Arle, e 'n sui felhs et iros,

Mas s' ieu m' aten en tro que despregutz

En sia 'l coms, ieu serai dreitz bretos,

Quar, on plus pren d' anta, mays s' umilia

Encontra selhs don li ven l' aunimens;

Per qu' ieu nulh temps no serai d' aitals sens,

S' om las rendas qu' ieu hi pert non rendia.

S' a mon senhor plai qu' ieu en patz n' esteia,

Prec li, si 'l plai, que mi sia suffrens,

Qu' ieu lur deman so de que sui perdens,

Qu' Alamano non es pas en Ongria.

Bertrand d' Alamanon.

XLIII, De l' arcivesque mi sap bon

XLIII.

De l' arcivesque mi sap bon

Q' ieu un sirventes fasa,

Don ieu dirai, dieus m' o perdon

Donei de mala casa;

De nul mal no si lassa

Que puesca far,

Ni tem duptar

En ren q' a dieu desplasa,

Qu' en totz fatz o traspassa,

Per que plus fols par que s' avi' amansa.

El ha los set peccatz mortals

Per q' om ten mala via;

Aucir no tem ne perjurs fals,

E viu de raubaria;

Ergueilh et avaria

A 'l renegatz,

Et es proatz

De falsa garentia;

Lo seten no diria,

Qar es tan laitz m' en lais per cortesia.

Anc non vi tan fals coronat

Nuls hom qi tenges terra,

Q' el no tem far tort ni peccat,

E mescla tot l' an gerra,

E 'ls sieus baissa en terra,

E 'ls pren soven

Per son fol sen,

E 'ls enclaus e 'ls enserra;

Veiatz del fals com erra,

Que per aver veda e solv e soterra.

Jonqera aucis per aver

Dinz la maison escura,

Qe anc nuls homs no i poig saber

Nuilh' autra forfachura;

El non a de dieu cura,

Per qe mescre

La ferma fe

Q' es en sant' escritura:

Ben er mal' aventura,

S' el legatz ve, si no 'l crema o no 'l mura.

Cill d' Arll' estavan a legor,

Ses trebailh e ses nausa,

Tro qe 'l agron lo fals pastor;

Ben es fols, qar el ausa

Penr' aissi la lur causa,

Ni far perdon

Del dan qe fon;

Veias ses fera causa,

Jamais non auran pausa,

Si no 'l meton tot viu de sot la lausa.

Bertrand d' Alamanon.

XLII, Peire salvagg', en greu pessar

XLII.

Peire salvagg', en greu pessar

Me fan estar

Dins ma maizo

Las Flors, que say volon passar,

Senes gardar

Dreg ni razo;

Don prec asselhs de Carcasses

E d' Ajanes,

Et als Guascos prec que lor pes,

Si Flor mi fan mermar de ma tenensa:

Mas tal cuia sai gazanhar perdo,

Qu' el perdos l' er de gran perdecio.

E mos neps, que sol flors portar,

Vol cambiar,

Don no m sap bo,

Son senhal; et auzem comtar

Que s fai nomnar

Rey d' Arago;

Mas cuy que plass', o cuy que pes,

Los mieus jaques

Si mesclaran ab lor tornes,

E plass' a dieu qu' el plus dreyturiers vensa! 

Qu' ieu ja nulh temps, per bocelh de Breto, 

No layssarai lo senhal del basto.

Si mi dons qu' es ab cors cortes,

Ples de totz bes,

Salvagge, valer mi volgues,

E del sieu cor me fes qualque valensa,

Per enemicx no m calgra garnizo,

Ab sol qu' ieu vis la sua plazen faisso.

Pierre, Roi d' Aragon.

XLI, Gerra mi play quan la vey comensar,

XLI.

Gerra mi play quan la vey comensar, 

Qar per gerra vey los pros enansar,

E per gerra vey mantz destriers donar; 

E per gerra vey l' escas larc tornar,

E per gerra vey tolre e donar,

E per gerra vey las nueigz trasnuechar;

Don gerra es drechuriera, so m par,

E gerra m play ses jamais entreugar.

A 'N Agout man, qar n' es primier comes,

Q' el en fasa demanda, cui q' en pes,

Tal q' en sion mant colps donat e pres,

E no s' en clam, qar no seria bes,

Qe sos paires no s' en clamera ges

De nul home per mal q om li feses,

Mas deman n' agra gran, fort et espes.

A 'N Amieu prec lo seinhor de Curban

Q' el en pes tenga la gerra e 'l masan,

Qe n' aion ops elm et escut e bran,

E 'l bon gerrier doblon lur prez ugan;

A amdos dic en chantan lausor gran,

Pero us d' els mi veira a son dan.

Bel m' es q' ieu veia en un bel camp rengatz 

Els, et ill nos, per tal bruit ajostatz,

Q' al ben ferir n' i aia de versatz;

Aqi veirem manz sirventz peceiatz,

Mantz cavals mortz, mantz cavaliers nafratz;

Se nulls non torna ja non serai iratz;

Mas vueilh murir qe viure desonratz.

Valenz domna, a vos m' autrei e m don,

Noveleta, de q' aten gierdon,

Et aurai l' en, qan aurai servit pron

Vostre gen cors fazonat per rason;

Mais vueilh servir, domna, tos temps perdon

Vos qu' autra, e m des ni anel ni cordon;

S' ieu mueir aman per vos, cug far mon pron,

Gentils domna, se lo non fos en oc,

Amanz del mon non agra tan bon loc

Del joi d' amor don aten honrat joc,

Q' al flac jelos cug dir mat ses tot roc.

Blacasset.

XL, Guerra e trebalhs e brega m platz, (Boniface de Castellane)

XL.

Guerra e trebalhs e brega m platz,

E m platz quan vey reiregarda,

E m play quan vey cavals armatz,

E m play quan vey grans colps ferir,

Qu' en ayssi m par terra estorta;

Qu' aitals es mos cors e mos sens,

E de plag say quascun jorn mens.

Silh d' Ast preno trega e patz,

E perdon, tro a Stafarda,

Tota la terra qu' es de latz;

Qu' en ayssi o ay auzit dir

Que cums era a lur porta,

Que no sol esser defendens

So que aras lur es nozens.

Lo dans dels Provensals mi platz,

E quar negus no s pren garda;

E 'ls Frances son tan ensenhatz

Que quascun jorn los fan venir

Liatz ab una redorta;

E no lur en pren chauzimens,

Tant los tenon per recrezens.

Mout m' enueia dels avocatz,

Qu' els vey anar a gran arda,

E dan cosselh dels autz prelatz,

Qu' anc nulh home non vi jauzir;

Ans qui son dreg lur aporta

Ilh dizon: Aisso es niens,

Tot es del comte veramens.

Los Genoes vey abayssatz

E 'l capitani que 'ls garda;

E de Ventamila 'ls comtatz

Perdon que solion tenir;

Donc be m par Genoa morta, 

La Poestatz n' es non calens

Que lur sol esser defendens.

Enans penria l' esporta,

Qu' ieu no li defenda mas gens

Am cavaliers et am sirvens.

Mauri, us joys me conorta,

Qu' ieu sai be que la plus valens

Me vol mais que totz sos parens.

Boniface de Castellane.

XXXIX, Belh m' es quan d' armas aug refrim (Guillaume de Montagnagout)

XXXIX.

Belh m' es quan d' armas aug refrim

De trompas lai on hom s' escrim,

E trazon prim

L' arquier melhor

Nostri e lor,

E vey de senhas bruella;

Adoncx trassalh

Cor de vassalh,

Tro que sos cors s' erguelha.

Com de Tolza, on plus es prim

Lo ricx, vos vey de pretz al cim;

E vuelh qu' aissi m

Don dieus s' amor,

Cum part lauzor

Vostre ric pretz capduelha;

Sol qu' a un talh,

Qui ara us falh

May ab nos no s' acuelha.

La Marcha, Foys e Rodes vim

Falhir ades als ops de prim,

Per qu' ie 'ls encrim,

De part honor

E de valor,

Don quasqus si despuelha;

Qu' en tal sonalh

An mes batalh

Don non tanh pretz los vuelha.

Jamais no s cug que s desencrim,

Quar trop s' a levat peior crim

Qu' el de Caim,

Hom qui l' amor

Del ric senhor

De Toloza era s tuelha;

Quar qui defalh,

Ni a senhor falh,

Greu er que no s' en duelha.

Si 'l rey Jacme, cuy no mentim, 

Complis so qu' elh e nos plevim, 

Segon qu' auzim,

En gran dolor

Foran ab plor

Frances, qui qu' o desvuelha;

E quar defalh,

Qu' ades no salh,

Totz lo mons lo 'n reiruelha.

Engles, de flor

Faitz capelh o de fuelha;

No us detz trebalh,

Neys qui us assalh,

Tro qu' om tot vos o tuelha.

Guillaume de Montagnagout.

XXXVIII, Estiers mon grat mi fan dir villanatge

XXXVIII.

Estiers mon grat mi fan dir villanatge

Li faillimen vironat de follia

D' un croi marques, e sai qu' eu fas follatge,

Q' ab escien failh per autrui follia;

Mas una res m' escuza, s' o enten,

Que si fossen cellat li faillimen,

Ja del faillir non agr' hom espaven;

E qui mal fa, ben dei sofrir q' om dia.

Per qu' eu dirai d' un fol nega barnatge,

Sosterra pretz, e destrui cortesia,

Qu' om ditz qu' es natz de Monferrat linatge,

Mas non pareis a l' obra qu' aissi sia;

Ans crei que fo fils o fraire de ven,

Tan cambia leu son cor e son talen:

En Bonifaz es clamatz falsamen,

Car anc bon faig non sap far a sa via.

Son sagramen sai eu qu' el mis en gatge

Als Milanes et a lur compagnia,

E 'n pres deniers per aunir son paratge,

E vendet lur la fe qu' el non avia;

Pero de fe d' eretges no 'l repren,

Qu' el jura leu e fail son sagramen;

E s' el annatz volgues rendre l' argen

Del sagramen, crei q' om lo quitaria.

Tant es avols e de menut coratge

Qu' anc jorn no 'l plac pretz de cavalaria,

Per qu' a perdut pro de son heritatge,

Q' anc non reqeis per ardiment un dia;

Mas qar a faz dos traimes tan gen

A son seingnor, a Tan primieramen,

Pois a Milan a cui frais convinen,

E cuia a obs cobrar sa manentia.

S' eu fos seigner ja no m feir' homenatge

Adrechamen, car sai qu' el no 'l tenria;

Ni m baisera mais de boch' el visatge,

Car autra vez la m baiset a Pavia,

Pois en baiset lo papa eissamen;

Donc pois aissi tota sa fe demen,

S' ab me jamais fezes paz ni coven,

Si no m baises en cul, ren no 'l creiria.

Ai! Monferrat plangues lo flac dolen,

Quar aunis vos e tota vostra gen,

Qu' aissi fenis l' onratz pretz veramen 

Que Monferratz per tot lo mon avia.

Aunit Marques, al diabol vos ren

Qui tal vassal taing aital segnoria.

Lanfranc Cigala.

XXXVII, Ja non creirai d' En Gui de Cavaillon

XXXVII.

Ja non creirai d' En Gui de Cavaillon

Qu' entr' els Franceis enpenga son leon

Per re que dompna 'l permetra ni 'l don;

Tan mal o fes al vencemen d' Uisson,

On non avia Francei ni Borgoignon;

Poiz auzem dir a 'N Guillem d' Esparnon

Que per paor desemparet Pisson,

Mal o fai Gui, car diz o c' anc non son,

Per deu, En Gui!

Per deu, En Gui, saubut es e proat

Q' el coms vos met d' un castel nou forsat,

Qe vos tengra per trop frevol lo grat,

Qui s' i mez es ab vostra volontat;

Ja non creirai qe tant aiatz brocat

Entr' els Franceis, cum sai avetz mandat;

En jutjamen o met d' En Reforzat,

Si vos es bos dins castel assejat,

Per deu, En Gui!

Bertrand Folcon.

XXXVI, Seigneiras e cavals armatz

XXXVI.

Seigneiras e cavals armatz

Ab vassals valens e prezatz,

Auran oimais loc e sazon;

E mand al Don de Corteson,

Sitot s' es ab Frances juratz,

Que non cuia estar en patz

Contra 'l cossolat d' Avignon.

E ja non vuoill esser celatz

Qu' el dans d' aqels del Bautz mi platz;

Et ai en ben dreich e razon,

Q' ill me fonderon Robion,

Et ancar no m' en sui vengatz;

Mas domentres qu' ieu tenc los daz,

Lor en cuich rendre guizerdon.

Coms, si voletz esser presatz,

Siatz adreitz et enseignatz,

Larcs et de bella mession;

Q' en aissi us tenra hom per bon,

Si als estrains et als privatz

Donatz, e 'ls enemics baissatz,

E c' ametz mais dir hoc que non.

Nostre mieitz princes s' es clamatz

Reis de Viena coronatz:

So sabon ben tuich siei baron;

Ar li vai dir tost, Bernardon,

Que non giesca de sos regnatz,

Si fort ben non era guizatz,

Que trop sovens chai en preison.

Gui de Cavaillon.

XXXV, Doas coblas farai en aqest son

XXXV.

Doas coblas farai en aqest son

Qu' eu trametrai a 'N Bertran d' Avignon,

E sapza be que dinz Castelnou son, 

E li Franceis nos estan d' eviron;

E membra m be de cela cui hom son,

Que soven det en broc e 'n esperon;

E crit m' enseigna, e desplec mon leon,

Per qu' eu o man a Bertram d' Avignon,

Hoc, a 'N Bertram.

A 'N Bertram Folc man com hom esserat

Per so qu' el aia de venir volontat,

Qu' el jorn estam nos e 'l caval armat;

E puois al vespre, can tost avem sopat,

Nos fan la gaita entr' el mur e 'l fossat;

Et ab Franceis non an ges entregat,

Enans i son maint colps pres e donat;

Et aizo a mais de tres mes passat,

E 'l i a pois tot soau sojornat,

Pois se parti de nos ses comiat

Bertram Folcon.

Gui de Cavaillon.

XXXIV, D' un sirventes m' es grans volontatz preza,

XXXIV.

D' un sirventes m' es grans volontatz preza,

Ricx homes flacx, e no sai que us disses,

Quar ja lauzor no y auria ben meza

Ni us aus blasmar, e val pauc sirventes

Que lauza quan blasmar deuria;

Pero sitot vos par follia,

A me platz mais que us blasme dizen ver,

Que si menten vos dizia plazer.

Amdos los reys an una cauz' enpreza,

Selh d' Arago et aisselh dels Engles,

Que no sia per elhs terra defeza

Ni fasson mal ad home qu' el lur fes,

E fan merce e cortezia,

Quar al rey que conquer Suria

Laisson en patz lur fieus del tot tener;

Nostre senher lur en deu grat saber.

Vergonha m pren, quant una gens conqueza

Nos ten aissi totz vencutz e conques,

E degr' esser aitals vergonha preza,

Quom a mi pren, al rey aragones

Et al rey que pert Normandia,

Mas prezan aital companhia

Que ja nulh temps no fasson lur dever,

Et anc non vitz autre tan ben tener.

E pus no pren en la leuda torneza

Qu' a Monpeslier li tollon siey borzes,

Ni no y s venja de l' anta que y a preza,

Ja no 'lh sia mais retragz Carcasses,

Pos als sieus eys no s defendria,

Assatz fa sol qu' en patz estia;

Patz non a ges senher ab gran poder,

Quan sas antas torna a non chaler.

Ges trop lauzar, quan valors es mal meza,

Non apel patz, quar mala guerra es;

Ni ja per me non er per patz enteza,

Mielhs deuria aver nom gauch de pages,

E dels ricx que perdon tot dia

Pretz, e ja fort greu no lur sia,

Quar pauc perdon e pauc lur deu doler,

Quar ges de pauc non pot hom trop mover.

Lo Reys N Anfos a laissat cobezeza

Als autres reys, qu' a sos ops non vol ges,

Et a sa part elh a preza largueza,

Mal a partit qui reptar l' en volgues;

E dic vos que m par vilania

Qui partis e qui 'l mielhs se tria; 

Mas ges per tant non a fag non dever, 

Quar a pres so qu' elhs no volon aver.

Ricx malastrucx, s' ieu vos sabia

Lauzor, volontiers la us diria;

Mas no us pessetz menten mi alezer,

Que vostre grat no vuelh ni vostr' aver.

Bernard de Rovenac.

XXXIII, Ja no vuelh do ni esmenda (Bernard de Rovenac)

XXXIII.

Ja no vuelh do ni esmenda

Ni grat retener

Dels ricx ab lur fals saber,

Qu' en cor ay que los reprenda

Dels vils fatz mal yssernitz;

E no vuelh sia grazitz

Mos sirventes entr' els flacx nualhos,

Paupres de cor et d' aver poderos.

Rey Engles prec que entenda,

Quar fa dechazer

Son pauc pretz per trop temer,

Quar no 'l play qu' els sieus defenda,

Qu' ans es tan flacx e marritz

Que par sia adurmitz,

Qu' elh reys franses li tolh en plas perdos 

Tors et Angieus e Normans e Bretos.

Rey d' Arago, ses contenda,

Deu ben nom aver

Jacme, quar trop vol jazer;

E qui que sa terra s prenda,

El es tan flacx e chauzitz

Que sol res no y contraditz;

E car ven lay als Sarrazis fellos

L' anta e 'l dan que pren sai vas Limos.

Ja tro son payre car venda

No pot trop valer,

Ni s cug qu' ieu 'l diga plazer

Tro foc n' abran e n' essenda

E 'n sian grans colps feritz;

Pueys er de bon pretz complitz,

S' al rey frances merma sas tenezos,

Quar el sieu fieu vol heretar N Anfos.

Coms de Toloza, la renda

Que soletz tener

De Belcaire us deu doler,

S' al deman faitz lonj' atenda

Vos e 'l reys que us es plevitz;

L' enprendemen n' er aunitz,

S' ar no vezem tendas e pabalhos,

E murs fondre, e cazer autas tors.

Ricx homes, mal yssernitz,

En vey hom vostres malz ditz,

E laissera us; s' ie us vis arditz ni pros,

Mas no us tem tan que ja m' en lays per vos.

Bernard de Rovenac.